بعلم الوصول عـزيزى الرئيس مبارك
كل سنة و انت كابس على نفسنا و مطيرالنوم من عين اللى جابونا و موفر فرص العمل الجامدة لاولاد المسئولين و اصحاب الوسايط و موفر لنا فرص العمل ام تلتميت و ربعميت جنيه و من غير تأمينات, مش عايزين منك غير تخلى بتوع المرور يخفوا علينا شوية بس
محمود ابراهيم - بكالوريوس هندسة وحاليا عقبال احفادك سائق ميكروباص
----------
ياريس
على النعمة انت راجل زى الفل و مايتشبعش من قعدتك و كل سنة و انت موفرلنا الامن و الامان كل سنة و موفر لنا سبل الاستثمار و فاتح لنا السوق ع البحرى
حسن الجعر - تاجر مخدرات
----------
سيدى الرئيس
ان كلماتنا لتعجز عن وصف امتنان مصر و وشعبها لك منذ قدت بحكمتك و شجاعتك الضربة الجوية الاو لى و .... منعا لحرق الدم سنكتفى بهذا القدر و للوصول لباقى التهنئة انظر الصفحة الاولى لاى جريدة قومية
احسان الموالس - رئيس تحرير جريدة قومية
----------
يا مباراك يا مبارك....فين ارباحنا يا مبارك
قل للخواجة يا مبارك.....يدينا زى ما ادالك
وماتفهمناش غلط
عامل مصرى باحدى الشركات المخصخصة
----------
احب اوجه تهنئة حارة معطرة من الصعيد الجوانى للريس و اقوله نفسنا بس الصرف الصحى يدخل القرية بتاعتنا و يبقى عندنا حمامات افرنجى فى بيوتنا
اسماعيل الدهشان - مواطن احدى قرى الصعيد الجوانى
----------
سيادة الرئيس
كل عام و انتم ساهرون على امن شرم الشيخ و نجدد العهد و الوعد و ميثاق الدم فى حماية امن و امان سيادتكم و اسرتكم بكل ما اوتينا من كهربا و عصيان و فلكات و كل ما يتاح لنا من ادوات لتاديب الشعب ابن الكلب و خلى سيادتك كده اى حد يتعدى حدوده و احنا نجيبه من سريره هو و عيلته و نجعل من عبرة لمن يعتبر فى منطقته
مبارك...شرم الشيخ.....بالامر
شديد ظالم - ضابط شرطة
----------
سيادة الرئيس
كل عام و سيادتكم بخير
كل عام و مليارتنا بخير
كل عام و بورصتنا مظبطانا
كل عام قوانينا الاقتصادية مريحانا
كل عام و بنوكنا مسلفانا
و السنة الجاية انشاء الله
جمال معانا
رجل اعمال و وزير حالى
----------
يـا مبارك
كل سنة توجع دماغنا بخطبك و كلامك اللى لا يودى ولا يجيب
عن انك لن تسمح باى ضرر يقع عليا
و رغم كده سنة عن سنة و انا طوب الارض بيلطش فيا
و انت ولا سائل فيا..اه يا قاسى
لغلية لما خلاص شكيت فى نفسى
و حاسس ان انا مش انا او انى مش موجود من اصله
محدود الدخل
السبت نوفمبر 24, 2007 1:54 pm
